Дзякуй вам, нашы матулі!

Подробности

Просмотров: 1345

 
Нават у самыя цяжкія моманты, калі ўвесь свет здаецца нам змрочным і недобразычлівым, дастаткова некалькі цёплых слоў, каб вярнуць нам энергію і жаданне жыць. Зразумела, калі гэтыя словы скажа нам матуля – самы блізкі і самы родны чалавек, які падтрымае ў любой сітуацыі. Урачыстае мерапрыемства, прысвечанае Дню маці, прайшло ў Палацы культуры.

— Пра маму можна гаварыць бясконца, але калі гучыць адно гэтае слова, то кожны з нас адразу адчувае вялікую павагу і любоў, — адзначыў старшыня райвыканкама Аляксандр Зазуля. – Менавіта яны, нашы мамы, абараняюць нас ад усіх няшчасцяў і нягод, дзякуючы іх малітвам мы перамагаем любыя цяжкасці.
Ва ўрачыстай атмасферы старшыня райвыканкама ўручыў ордэны Маці – нагадаем, гэтая дзяржаўная ўзнагарода ўручаецца жанчынам, якія нарадзілі і выхоўваюць пяць і больш дзяцей. Сёлета ордэнам Маці былі ўзнагароджаны жывёлавод СВК “Узыходзячая зара” Наталля Дзмітрук, работнік ААТ “Батчы” Таццяна Кухар, хатняя гаспадыня з Быстрыцы Ірына Любрыцкая, Надзея Любчук з ДСУП “Сельгас-Павіцце” і работнік дзіцячай школы мастацтваў г. Кобрына Таццяна Шпендзік. Шчырыя віншаванні, памятныя падарункі і, канешне, заслужаныя апладысменты – менавіта такім запоўніўся гэты ўрачысты момант для галоўных гераінь і гасцей мерапрыемства.
А зусім хутка залу літаральна захапіў святочны канцэрт, які ўвасобіў у сабе ўсю цеплыню, якая для кожнага з нас звязана з гэтым чароўным словам — мама. Цыркавыя нумары, танцы, песні ў выкананні як самых маленькіх, так і дарослых кобрынскіх талентаў не пакінулі раўнадушным нікога, ператварыўшы гэты зусім не ласкавы асенні вечар у добрае і светлае свята. Застаецца толькі пажадаць усім нам успамінаць пра нашых матуль не толькі са святочнай нагоды, ніколі не забываць пра іх пяшчоту і любоў, дзякуючы якім мы сталі тымі, кім ёсць.